Бацькоўскае шчасце
Як птушаня ў гняздзечку, 
як кураня да курыцы, 
дзяўчыначка ў пасцельцы 
бліжэй да мамы туліцца, 
сваёй маленькай ручкаю 
за шыю абдымаецца. 
Магчыма, гэта шчасцем 
бацькоўскім называецца. 
Ганна Рэлікоўская
 

Чысцюля
“Ірыначка, Ірынка, 
маленькая дзяўчнка, 
дзяўчынка-шчабятушка, 
ці мыла свае шчочкі? 
Ці мыла свае вочкі?” – 
пытаюся, усміхаюся, 
з Ірынкай забаўляюся. 
Ірыначка мне кажа: 
“Я ўся была ў сажы, 
я мыла свае шчочкі, 
і вушкі два, і вочкі. 
Я ручкі доўга мыла, 
аж не хапіла мыла”. 
Якая малайчынка, 
Дзяўчыначка – Ірынка! 
Ганна Рэлікоўская
 

Чамучка
Язычок той не прыціснуць 
і пытанняў не спыніць: 
Чаму дожджык раптам сціхнуў? 
Чаму сонейка не спіць? 
Чаму вокны адчынілі, 
напусцілі камароў? 
Чаму супу наварылі 
з памідораў, буракоў? 
Па дарожцы будзе бегаць 
то ўзад, то ўпярод. 
Чалавек усё хоча ведаць, 
бо яму ўжо пяты год!
Ганна Рэлікоўская

Свята
У бабкі з дзядулем 
Настрой прыўзняты: 
Яны сёння першымі ўбачылі 
Свята 

А тата ў здзіўленні, 
Не верыцца тату: 
- Звычайны аўторак. 
Адкуль жа быць святу? 

Не меней за тату 
Здзіўлена мама: 
Пра свята не ведае 
Мама таксама. 

А свята са спальні 
Імчыцца па хаце: 
Сама ўпершыню 
Апранулася Каця.
Уладзімір Бабкоў
 

Раніца
Як надыдзе раніца – 
Кожны з нас збіраецца: 
Тата з мамай на завод, 
Дзе працуюць многа год, 
На заняткі ў школу брат. 
Ну, а я ў дзіцячы сад.
Ніна Галіноўская